你上一次用电话亭倾电话係几多年前? 随住手机普及，公共电话变得可有可无，不过几日前日本居然出现排公共电话人龙奇景，究竟咩事?
原来日本三大电讯商之一Softbank早几日发生全国大规模故障，电话、互联网服务瘫痪5个钟，打唔到电话、上唔到网，对机不离手嘅现代人嚟讲简直係灾难! 同日「SoftBank」、「通信障害」即刻上咗twitter热门关键字排行榜!
一齐入榜嘅关键字仲有「高みの见物」，意思係使用其他电信商嘅人在隔岸观火；另一个就係「公衆电话」，好多后生仔表示，咁大个人都係第一次打公共电话，出现好多虾碌事好似冇散纸、冇电话卡同埋唔识点样打等等…有网民仲话因工作关係打唔到电话太烦，只好拎住10圆周围搵电话，「第一次觉得公共电话好神」!
为咗令呢个公共设施起死回生，世界各地唔少人绞尽脑汁帮电话亭转型，帮呢个老古董再次服务社会，除咗避雨、供超人变身，仲有以下几个用途:
1. up-grade功能
红色电话亭係伦敦标志，不过部份电话亭已涂上绿色，变成手机充电站。奥地利电话亭就被改装成电动车充电站，由太阳能发电，为电动车、电动绵羊仔及电动单车充电。另外，好多城市包括香港，都将电话亭改装成免费WiFi热点，提供上网、国内免费通话、充电等多项功能。
2. 公共艺术
英国有小镇将电话亭改造成可能係全世界最微你嘅画廊，由一位65岁老人创立，搜集当地居民各类画作于亭内展出。大阪有艺术家将电话亭活化成金鱼缸，金鱼喺日本文化中，有幸福、欢乐意思，装置艺术旨在令途人与「金鱼缸」擦身而过时获得幸福快乐。
3. 社区服务
苏格兰有小镇将电话亭变成24小时自助café及资讯中心，途人可一边饮咖啡一边上网，拎介绍当地景点嘅小册子。英国有电话公司将100个电话亭改造成小商店，再以低价租畀长期待业者，帮佢哋自力更生，小店种类多元化，有糖果店、café、网吧及别具传统特色嘅擦鞋档口等。英国西南部也有一批小镇居民，在区内唯一电话亭装上四层书架，成为迷你图书馆，各自将自己喜爱嘅好书、唱片、影碟放上书架，与邻里分享。
图片来源: thetv.jp
